hadson ka silsila manzar-ba-manzar jam gaya

hādsoñ kā silsila manzar-ba-manzar jam gayā

har kisī ke dhaḌ pe ik fir.aun kā sar jam gayā

ḳhaak kī kashtī tale sone kā sāġhar jam gayā

dīda-e-be-ḳhvāb meñ ḳhvāb-e-sikandar jam gayā

mausamoñ ke biich kī duurī kā andāza lagāo

bah ga.e parbat pighal kar aur samundar jam gayā

laḌkhaḌā kar gir paḌī ūñchī imārat daf.atan

daf.atan tā'mīr kī kursī pe khañDar jam gayā

rif.at-e-charḳh-e-barīñ mahdūd ho kar rah ga.ī

jab saroñ par dhund kā saffāk lashkar jam gayā

dīda-e-gurba se kyā phūTī shuā-e-jāñ-guzā

phaḌphaḌāyā tak nahīñ zinda kabūtar jam gayā

ahl-e-duniyā se mujhe to koī andesha na thā

naam terā kis liye mere laboñ par jam gayā

hadson ka silsila manzar-ba-manzar jam gaya

har kisi ke dhaD pe ek firaun ka sar jam gaya

KHak ki kashti tale sone ka saghar jam gaya

dida-e-be-KHwab mein KHwab-e-sikandar jam gaya

mausamon ke bich ki duri ka andaza lagao

bah gae parbat pighal kar aur samundar jam gaya

laDkhaDa kar gir paDi unchi imarat dafatan

dafatan ta'mir ki kursi pe khanDar jam gaya

rifat-e-charKH-e-barin mahdud ho kar rah gai

jab saron par dhund ka saffak lashkar jam gaya

dida-e-gurba se kya phuTi shua-e-jaan-guza

phaDphaDaya tak nahin zinda kabutar jam gaya

ahl-e-duniya se mujhe to koi andesha na tha

nam tera kis liye mere labon par jam gaya