hae aalam wo us se ruKHsat ka

haa.e aalam vo us se ruḳhsat kā

ek manzar thā bas qayāmat kā

kaam saarā ḳharāb karne meñ

daḳhl hai sirf merī ujlat kā

maiñ muravvat meñ maarā jaatā huuñ

kyā karūñ apnī is tabī.at kā

mujh se kaise nibāh kījiyegā

maiñ to banda huuñ bas zarūrat kā

gosha-gīrī mujhe ġhanīmat hai

shauq mujh ko nahīñ hai shohrat kā

koī batlā.e shaiḳh sāhab ko

kyā taqāzā hai ādamiyyat kā

ma.azarat maiñ uThā nahīñ saktā

baar ab aap kī amānat kā

aaj ik aadmī milā thā mujhe

hū-bahū aap jaisī sūrat kā

maañ mujassam duā hai mere liye

baap hai sā.ebān shafqat kā

mujh se kuchh bul-havas haiñ jin se 'vasīm'

naam badnām hai mohabbat kā

hae aalam wo us se ruKHsat ka

ek manzar tha bas qayamat ka

kaam sara KHarab karne mein

daKHl hai sirf meri ujlat ka

main murawwat mein mara jata hun

kya karun apni is tabiat ka

mujh se kaise nibah kijiyega

main to banda hun bas zarurat ka

gosha-giri mujhe ghanimat hai

shauq mujh ko nahin hai shohrat ka

koi batlae shaiKH sahab ko

kya taqaza hai aadamiyyat ka

mazarat main uTha nahin sakta

bar ab aap ki amanat ka

aaj ek aadmi mila tha mujhe

hu-bahu aap jaisi surat ka

man mujassam dua hai mere liye

bap hai saeban shafqat ka

mujh se kuchh bul-hawas hain jin se 'wasim'

nam badnam hai mohabbat ka