hae jaanana ki mehman-dariyan

haa.e jānāna kī mehmāñ-dāriyāñ

aur mujh dil kī badan āzāriyāñ

Dhā ga.iiñ dil ko tirī dahlīz par

terī qattāla surīnī bhāriyāñ

uf shikan-hā-e-shikam jānam tirī

kyā kaTāreñ haiñ kaTāreñ kāriyāñ

haa.e terī chhātiyoñ kā tan-tanāv

phir terī majbūriyāñ nāchāriyāñ

tishna-lab hai kab se dil sā shīr-ḳhvār

tere dūdhoñ se haiñ chashme jāriyāñ

dukh ġhurūr-e-hashr ke jaanā hai kaun

kis ne samjhī hashr kī dushvāriyāñ

apne darbāñ ko sañbhāle rakhiye

haiñ havas kī apnī izzat-dāriyāñ

haiñ sidhārī kaun se shahroñ taraf

laḌkiyāñ vo dil galī kī sāriyāñ

ḳhvāb jo tā'bīr ke bas ke na the

dostoñ ne un pe jāneñ vāriyāñ

ḳhalvat-e-mizrāb-e-sāz-o-nāz meñ

chāhiye ham ko terī siskāriyāñ

lafz-o-ma'ānī kā baham kyuuñ hai suḳhan

kis zamāne meñ thiiñ in meñ yāriyāñ

shauq kā ik daav be-shauqī bhī hai

ham haiñ us ke husn ke inkāriyāñ

mujh se bad-taurī na kar o shahr-e-yār

mere jūtoñ ke hai talve ḳhāriyāñ

khā ga.iiñ us zālim-o-mazlūm ko

merī mazlūmī-numā ayyāriyāñ

ye harāmī haiñ ġharīboñ ke raqīb

haiñ mulāzim sab ke sab sakāriyāñ

vo jo haiñ jiite unhoñne be-tarah

jītne par himmateñ haiñ hāriyāñ

tum se jo kuchh bhī na kah paa.eñ miyāñ

āḳhirash kartī vo kyā be-chāriyāñ

hae jaanana ki mehman-dariyan

aur mujh dil ki badan aazariyan

Dha gain dil ko teri dahliz par

teri qattala surini bhaariyan

uf shikan-ha-e-shikam jaanam teri

kya kaTaren hain kaTaren kariyan

hae teri chhatiyon ka tan-tanaw

phir teri majburiyan nachaariyan

tishna-lab hai kab se dil sa shir-KHwar

tere dudhon se hain chashme jariyan

dukh ghurur-e-hashr ke jaana hai kaun

kis ne samjhi hashr ki dushwariyan

apne darban ko sanbhaale rakhiye

hain hawas ki apni izzat-dariyan

hain sidhaari kaun se shahron taraf

laDkiyan wo dil gali ki sariyan

KHwab jo ta'bir ke bas ke na the

doston ne un pe jaanen wariyan

KHalwat-e-mizrab-e-saz-o-naz mein

chahiye hum ko teri siskariyan

lafz-o-ma'ani ka baham kyun hai suKHan

kis zamane mein thin in mein yariyan

shauq ka ek daw be-shauqi bhi hai

hum hain us ke husn ke inkariyan

mujh se bad-tauri na kar o shahr-e-yar

mere juton ke hai talwe KHariyan

kha gain us zalim-o-mazlum ko

meri mazlumi-numa ayyariyan

ye harami hain gharibon ke raqib

hain mulazim sab ke sab sakariyan

wo jo hain jite unhonne be-tarah

jitne par himmaten hain haariyan

tum se jo kuchh bhi na kah paen miyan

aaKHirash karti wo kya be-chaariyan