ہائے کیا انقلاب عالم ہے

ہائے کیا انقلاب عالم ہے

وہ جو شعلہ تھا آج شبنم ہے

اور کیوں کوئی اس پہ اشک بہائے

زندگی زندگی کا ماتم ہے

ہم پہ جو بیتنی تھی بیت گئی

ہو اگر کوئی ابن مریم ہے

ان کی نظروں میں کیا خوشی کا وقار

جن کو احساس عظمت غم ہے

گردش روزگار سے پوچھو

کون مونس ہے کون ہمدم ہے

کسی کروٹ سکوں نہیں اس کو

زندگی اضطراب پئےہم ہے

پھر یہ اندیشۂ جراحت کیوں

زخم دل بے نیاز مرہم ہے

نہیں کچھ کم حسیں خیال ترا

تو نہیں ہے تو مجھ کو کیا غم ہے

دل کی عظمت کو بھول کر ناداں

تو طلب گار ساغر جم ہے

دینے والے نے غم دیا طالبؔ

یہ عنایت کسی کی کیا کم ہے