ہائے کیا منظر تھے جو آنکھوں سے اوجھل ہو گئے

ہائے کیا منظر تھے جو آنکھوں سے اوجھل ہو گئے

ہنستے بستے شہر بھی ویران جنگل ہو گئے

پاگلوں کو لوگ تو رکھتے ہیں زنجیروں میں قید

ہم تری زنجیر سے نکلے تو پاگل ہو گئے

دیکھ تو نے درد کے رنگوں سے ہم کو بھر دیا

دیکھ ہم تصویر غم بن کر مکمل ہو گئے

اس تگ و دو میں کہ ساری عمر ہو تیرے لیے

دوست ہم اپنے لیے گزرا ہوا پل ہو گئے

میں کھلے میدان میں یک لخت آ کر رک گیا

سامنے تھے ہی نہیں جو در مقفل ہو گئے

شہر سارا اس کی آنکھوں میں کہیں گم ہو گیا

اس کو جتنے دیکھنے والے تھے پاگل ہو گئے

ہم بہانے ڈھونڈتے تھے زندگی کے واسطے

تیرے آنے سے ہمارے مسئلے حل ہو گئے