hae kya manzar the jo aankhon se ojhal ho gae

haa.e kyā manzar the jo āñkhoñ se ojhal ho ga.e

hañste baste shahr bhī vīrān jangal ho ga.e

pāgaloñ ko log to rakhte haiñ zanjīroñ meñ qaid

ham tirī zanjīr se nikle to pāgal ho ga.e

dekh tū ne dard ke rangoñ se ham ko bhar diyā

dekh ham tasvīr-e-ġham ban kar mukammal ho ga.e

is tag-o-dau meñ ki saarī 'umr ho tere liye

dost ham apne liye guzrā huā pal ho ga.e

maiñ khule maidān meñ yak-laḳht aa kar ruk gayā

sāmne the hī nahīñ jo dar muqaffal ho ga.e

shahr saarā us kī āñkhoñ meñ kahīñ gum ho gayā

us ko jitne dekhne vaale the pāgal ho ga.e

ham bahāne DhūñDte the zindagī ke vāste

tere aane se hamāre mas.ale hal ho ga.e

hae kya manzar the jo aankhon se ojhal ho gae

hanste baste shahr bhi viran jangal ho gae

pagalon ko log to rakhte hain zanjiron mein qaid

hum teri zanjir se nikle to pagal ho gae

dekh tu ne dard ke rangon se hum ko bhar diya

dekh hum taswir-e-gham ban kar mukammal ho gae

is tag-o-dau mein ki sari 'umr ho tere liye

dost hum apne liye guzra hua pal ho gae

main khule maidan mein yak-laKHt aa kar ruk gaya

samne the hi nahin jo dar muqaffal ho gae

shahr sara us ki aankhon mein kahin gum ho gaya

us ko jitne dekhne wale the pagal ho gae

hum bahane DhunDte the zindagi ke waste

tere aane se hamare masale hal ho gae