hae re ahd-e-guzishta ki karam-farmaiyan

haa.e re ahd-e-guzishta kī karam-farmā.iyāñ

anjuman-dar-anjuman tanhā.iyāñ tanhā.iyāñ

ishq ko hāsil haiñ un kī bhī karam-farmā.iyāñ

umr bhar karte rahe haiñ jo sitam-ārā.iyāñ

mil ke donoñ ne mujhe rusvā-e-duniyā kar diyā

kuchh merī nādāniyāñ thiiñ kuchh tirī dānā.iyāñ

lafz-o-ma.anī meñ ulajh kar rah ga.e ahbāb sab

kaash koī dekh saktā qalb kī gahrā.iyāñ

ab ḳhulūs-e-dil kī bāteñ ḳhvāb ho kar rah ga.iiñ

jis taraf dekho faqat parchhā.iyāñ parchhā.iyāñ

koī hañstā to nahīñ aañsū bahāne par mire

bā.is-e-taskīn-e-ḳhātir haiñ mujhe tanhā.iyāñ

dekhiye ye bhī ki dil kā ḳhuun hotā to nahīñ

vaj.h-e-raunaq hī sahī ye anjuman-ārā.iyāñ

merī nazroñ ne unheñ kuchh gudgudāyā is tarah

karvaTeñ lene lagīñ soī huī añgḌā.iyāñ

ahl-e-duniyā se shikāyat kyā gila kyā rañj kyā

mujh ko le Dūbīñ mire ehsās kī gahrā.iyāñ

dard-e-dil jab tak na shāmil ho to 'qādir' sher kyā

zindagī bhar karte rahiye qāfiya-paimā.iyāñ

hae re ahd-e-guzishta ki karam-farmaiyan

anjuman-dar-anjuman tanhaiyan tanhaiyan

ishq ko hasil hain un ki bhi karam-farmaiyan

umr bhar karte rahe hain jo sitam-araiyan

mil ke donon ne mujhe ruswa-e-duniya kar diya

kuchh meri nadaniyan thin kuchh teri danaiyan

lafz-o-mani mein ulajh kar rah gae ahbab sab

kash koi dekh sakta qalb ki gahraiyan

ab KHulus-e-dil ki baaten KHwab ho kar rah gain

jis taraf dekho faqat parchhaiyan parchhaiyan

koi hansta to nahin aansu bahane par mere

bais-e-taskin-e-KHatir hain mujhe tanhaiyan

dekhiye ye bhi ki dil ka KHun hota to nahin

wajh-e-raunaq hi sahi ye anjuman-araiyan

meri nazron ne unhen kuchh gudgudaya is tarah

karwaTen lene lagin soi hui angDaiyan

ahl-e-duniya se shikayat kya gila kya ranj kya

mujh ko le Dubin mere ehsas ki gahraiyan

dard-e-dil jab tak na shamil ho to 'qadir' sher kya

zindagi bhar karte rahiye qafiya-paimaiyan