hae taqdir ki jine ka sahaara TuTa

haa.e taqdīr ki jiine kā sahārā TuuTā

jab kināre lagī kashtī to kinārā TuuTā

dil kī duniyā meñ ujāle kā kahīñ naam nahīñ

zindagī jis se thī raushan vo sitārā TuuTā

pahle ummīd meñ jiite the bahār aane kī

jab bahār aa.ī to jiine kā sahārā TuuTā

zindagī hotī hai dam-bhar ke liye duniyā meñ

bulbula kar ke ye hasrat se ishārā TuuTā

qatra-e-ashk girā aañkh se jis dam koī

dil pukār uTThā ki ummīd kā taarā TuuTā

be-talab jab the to tālib thī hamārī duniyā

ab talab hai to jahāñ-bhar kā sahārā TuuTā

khulte hī bahr meñ uf phuuT ga.ī chashm-e-habāb

nā-gahāñ silsila-e-zauq-e-nazārā TuuTā

sāqī-e-bazm ne vo Thes lagā.ī ki 'azīz'

jām-o-mīnā hī nahīñ dil bhī hamārā TuuTā

hae taqdir ki jine ka sahaara TuTa

jab kinare lagi kashti to kinara TuTa

dil ki duniya mein ujale ka kahin nam nahin

zindagi jis se thi raushan wo sitara TuTa

pahle ummid mein jite the bahaar aane ki

jab bahaar aai to jine ka sahaara TuTa

zindagi hoti hai dam-bhar ke liye duniya mein

bulbula kar ke ye hasrat se ishaara TuTa

qatra-e-ashk gira aankh se jis dam koi

dil pukar uTTha ki ummid ka tara TuTa

be-talab jab the to talib thi hamari duniya

ab talab hai to jahan-bhar ka sahaara TuTa

khulte hi bahr mein uf phuT gai chashm-e-habab

na-gahan silsila-e-zauq-e-nazara TuTa

saqi-e-bazm ne wo Thes lagai ki 'aziz'

jam-o-mina hi nahin dil bhi hamara TuTa