hajat banao ki nahin tumko shabab mein

hājat banāo kī nahīñ tum ko shabāb meñ

yūsuf tumhīñ to ho miyāñ apne hisāb meñ

aate nahīñ jo sharm ke maare vo ḳhvāb meñ

ye bhī koī hijāb hai guyyāñ hijāb meñ

ranDī ke chhoḌne ko jo kahtī huuñ chheḌ kar

dete haiñ gāliyāñ mujhe hañs kar javāb meñ

farmā.isheñ ye saut ko bhī bhejne lage

aisā maza milā mire dil ke kabāb meñ

sun sun ke begameñ buā sab khelne lagīñ

'anqā' ne reḳhtī jo bajā.ī rabāb meñ

kyā ḳhush-nasīb hai vo nigoḌī jahān meñ

dam nikle jis kā yād-e-shah-e-bū-turāb meñ

ruk ruk ke ashk āñkhoñ meñ kīchaḌ se jam ga.e

kaa.ī hai jā-ba-jā mirī chashm-e-pur-āb meñ

khā kar afiim so na rahūñ maiñ to kyā karūñ

rahte haiñ aap pīnak-e-afyūn-e-nāb meñ

vo jā ke shab ko pech laḌā.eñ jo saut se

kyoñ kaT na jā.ūñ maiñ buā is pech-o-tāb meñ

'anqā' adū se kah do ki pishvāz pahn le

laa.e jo raat reḳhtī ke vo javāb meñ

hajat banao ki nahin tum ko shabab mein

yusuf tumhin to ho miyan apne hisab mein

aate nahin jo sharm ke mare wo KHwab mein

ye bhi koi hijab hai guyyan hijab mein

ranDi ke chhoDne ko jo kahti hun chheD kar

dete hain galiyan mujhe hans kar jawab mein

farmaishen ye saut ko bhi bhejne lage

aisa maza mila mere dil ke kabab mein

sun sun ke begamen bua sab khelne lagin

'anqa' ne reKHti jo bajai rabab mein

kya KHush-nasib hai wo nigoDi jahan mein

dam nikle jis ka yaad-e-shah-e-bu-turab mein

ruk ruk ke ashk aankhon mein kichaD se jam gae

kai hai ja-ba-ja meri chashm-e-pur-ab mein

kha kar afim so na rahun main to kya karun

rahte hain aap pinak-e-afyun-e-nab mein

wo ja ke shab ko pech laDaen jo saut se

kyon kaT na jaun main bua is pech-o-tab mein

'anqa' adu se kah do ki pishwaz pahn le

lae jo raat reKHti ke wo jawab mein