حاجت بناؤ کی نہیں تم کو شباب میں

حاجت بناؤ کی نہیں تم کو شباب میں

یوسف تمہیں تو ہو میاں اپنے حساب میں

آتے نہیں جو شرم کے مارے وہ خواب میں

یہ بھی کوئی حجاب ہے گوئیاں حجاب میں

رنڈی کے چھوڑنے کو جو کہتی ہوں چھیڑ کر

دیتے ہیں گالیاں مجھے ہنس کر جواب میں

فرمائشیں یہ سوت کو بھی بھیجنے لگے

ایسا مزہ ملا مرے دل کے کباب میں

سن سن کے بیگمیں بوا سب کھیلنے لگیں

عنقاؔ نے ریختی جو بجائی رباب میں

کیا خوش نصیب ہے وہ نگوڑی جہان میں

دم نکلے جس کا یاد شہہ بو تراب میں

رک رک کے اشک آنکھوں میں کیچڑ سے جم گئے

کائی ہے جا بجا مری چشم پر آب میں

کھا کر افیم سو نہ رہوں میں تو کیا کروں

رہتے ہیں آپ پینک افیون ناب میں

وہ جا کے شب کو پیچ لڑائیں جو سوت سے

کیوں کٹ نہ جاؤں میں بوا اس پیچ و تاب میں

عنقاؔ عدو سے کہہ دو کہ پشواز پہن لے

لائے جو رات ریختی کے وہ جواب میں