hakim-e-waqt ke iqbaal se kya kya na hua

hākim-e-vaqt ke iqbāl se kyā kyā na huā

dil ke zaḳhmoñ kā magar koī mudāvā na huā

sar paTakte hī phire raah kī tanhā.ī meñ

ahl-e-fan ke liye darvāza koī vā na huā

zulmat-e-shab meñ koī rāhbarī kyā kartā

ek taarā bhī sar-e-arsh hamārā na huā

maiñ vo ik abr kā TukḌā huuñ ki sab ke ġham meñ

merā saaya bhī mire vāste saaya na huā

shahr ke ġham meñ palaT aaya huuñ vīrānoñ se

shauq bhī apnā ba-andāza-e-sahrā na huā

apne ehsās-e-sitam hī kī qasam hai ham ko

ham ne darvāza hī toḌā hai agar vā na huā

dūsroñ ke liye marnā hī masīhā.ī hai

garche is ahd meñ is tarah se jiinā na huā

do pahar zindagī dhūpoñ meñ jo taptī hī rahī

ek kāñTā hai ki jis kā koī saayā na huā

rang-o-millat kā mujhe hosh kahāñ se 'anvar'

maiñ to ḳhushbu-e-mohabbat se huuñ dīvāna huā

hakim-e-waqt ke iqbaal se kya kya na hua

dil ke zaKHmon ka magar koi mudawa na hua

sar paTakte hi phire rah ki tanhai mein

ahl-e-fan ke liye darwaza koi wa na hua

zulmat-e-shab mein koi rahbari kya karta

ek tara bhi sar-e-arsh hamara na hua

main wo ek abr ka TukDa hun ki sab ke gham mein

mera saya bhi mere waste saya na hua

shahr ke gham mein palaT aaya hun viranon se

shauq bhi apna ba-andaza-e-sahra na hua

apne ehsas-e-sitam hi ki qasam hai hum ko

hum ne darwaza hi toDa hai agar wa na hua

dusron ke liye marna hi masihai hai

garche is ahd mein is tarah se jina na hua

do pahar zindagi dhupon mein jo tapti hi rahi

ek kanTa hai ki jis ka koi saya na hua

rang-o-millat ka mujhe hosh kahan se 'anwar'

main to KHushbu-e-mohabbat se hun diwana hua