haal-e-dil-e-bimar samajh mein chaaragaron ki aae kam

hāl-e-dil-e-bīmār samajh meñ chāragaroñ kī aa.e kam

bechainī ho jaa.e ziyāda dard agar ho jaa.e kam

ashk nigal jā.ūñ to yaqīnan shiddat-e-ġham ho jaa.e kam

dil kā jhulas jaanā lāzim hai aah jo lab par aa.e kam

mujh ko hai taslīm qafas meñ phūloñ ke haiñ saa.e kam

haa.e magar vo jin ko chaman kī āb-o-havā raas aa.e kam

rāh-e-talab meñ har manzil par ho tajdīd-e-azm-e-safar

rahrav ko ārām na aa.e aur jo aa.e aa.e kam

qāmat-e-fan kī baat alag meyār-e-hunar kī baat alag

shahr-e-suḳhan gunjān hai lekin haiñ mere ham-sā.e kam

apne aib se vāqif honā sab se baḌā hai kār-e-hunar

aadmī ḳhud ā.īna dekhe auroñ ko dikhlā.e kam

pūchhne vaalo haal na pūchho ishq meñ ab ye aalam hai

ḳhud par hañsnā aa.e ziyāda dil par ronā aa.e kam

āriz-e-rañgīñ kahne meñ tausīf to hai tashbīh nahīñ

phuul pe aa.e us kī shabāhat phuul kī us par aa.e kam

shahr-e-nafas se vādī-e-jāñ tak saikḌoñ nāzuk rishte haiñ

saañs na rukne paa.e 'aḳhgar' dard na hone paa.e kam

haal-e-dil-e-bimar samajh mein chaaragaron ki aae kam

bechaini ho jae ziyaada dard agar ho jae kam

ashk nigal jaun to yaqinan shiddat-e-gham ho jae kam

dil ka jhulas jaana lazim hai aah jo lab par aae kam

mujh ko hai taslim qafas mein phulon ke hain sae kam

hae magar wo jin ko chaman ki aab-o-hawa ras aae kam

rah-e-talab mein har manzil par ho tajdid-e-azm-e-safar

rahraw ko aaram na aae aur jo aae aae kam

qamat-e-fan ki baat alag meyar-e-hunar ki baat alag

shahr-e-suKHan gunjaan hai lekin hain mere ham-sae kam

apne aib se waqif hona sab se baDa hai kar-e-hunar

aadmi KHud aaina dekhe auron ko dikhlae kam

puchhne walo haal na puchho ishq mein ab ye aalam hai

KHud par hansna aae ziyaada dil par rona aae kam

aariz-e-rangin kahne mein tausif to hai tashbih nahin

phul pe aae us ki shabahat phul ki us par aae kam

shahr-e-nafas se wadi-e-jaan tak saikDon nazuk rishte hain

sans na rukne pae 'aKHgar' dard na hone pae kam