haal-e-dil is tarah chhupata hun

hāl-e-dil is tarah chhupātā huuñ

jab bhī miltā huuñ muskurātā huuñ

raat bhar ḳhvāb jo sajātā huuñ

din nikaltā hai bhuul jaatā huuñ

mere kamre meñ sirf kāġhaz hai

maiñ charāġhoñ se ḳhauf khātā huuñ

āj-kal vo bhī kuchh nahīñ kahtā

maiñ bhī ḳhāmosh lauT aatā huuñ

ūñche logoñ meñ baiTh kar maiñ bhī

apnī auqāt bhuul jaatā huuñ

jvār-bhāTā mirī ragoñ meñ hai

maiñ samundar sameT laatā huuñ

kis kī bāhoñ meñ TūTnā thā mujhe

kis kī bāñhoñ meñ chhaTpaTātā huuñ

chāñdnī jhūltī hai shāne par

chāñd ko god meñ khilātā huuñ

raat kaTtī hai āsmānoñ par

din ko maiñ bakriyāñ charātā huuñ

apsarā.eñ mujhe bulātī haiñ

devtāoñ ko maiñ bulātā huuñ

khet to paT ga.e haiñ lāshoñ se

ret meñ sabziyāñ ugātā huuñ

haal-e-dil is tarah chhupata hun

jab bhi milta hun muskuraata hun

raat bhar KHwab jo sajata hun

din nikalta hai bhul jata hun

mere kamre mein sirf kaghaz hai

main charaghon se KHauf khata hun

aaj-kal wo bhi kuchh nahin kahta

main bhi KHamosh lauT aata hun

unche logon mein baiTh kar main bhi

apni auqat bhul jata hun

jwar-bhaTa meri ragon mein hai

main samundar sameT lata hun

kis ki bahon mein TuTna tha mujhe

kis ki banhon mein chhaTpaTata hun

chandni jhulti hai shane par

chand ko god mein khilata hun

raat kaTti hai aasmanon par

din ko main bakriyan charaata hun

apsaraen mujhe bulati hain

dewtaon ko main bulata hun

khet to paT gae hain lashon se

ret mein sabziyan ugata hun