haal-e-dil maine jo duniya ko sunana chaha

hāl-e-dil maiñ ne jo duniyā ko sunānā chāhā

mujh ko har shaḳhs ne dil apnā dikhānā chāhā

apnī tasvīr banāne ke liye duniyā meñ

maiñ ne har rañg pe ik rañg chaḌhānā chāhā

ḳhāk-e-dil jauhar-e-ā.īna ke kaam aa hī ga.ī

laakh duniyā ne nigāhoñ se girānā chāhā

sho.ala-e-barq se gulshan ko bachāne ke liye

maiñ ne har aag ko siine meñ chhupānā chāhā

apne aiboñ ko chhupāne ke liye duniyā meñ

maiñ ne har shaḳhs pe ilzām lagānā chāhā

ġhairat-e-mauj use pheñk ga.ī sāhil par

Dūbne vaale ne jab shor machānā chāhā

haal-e-dil main ne jo duniya ko sunana chaha

mujh ko har shaKHs ne dil apna dikhana chaha

apni taswir banane ke liye duniya mein

main ne har rang pe ek rang chaDhana chaha

KHak-e-dil jauhar-e-aina ke kaam aa hi gai

lakh duniya ne nigahon se girana chaha

shoala-e-barq se gulshan ko bachane ke liye

main ne har aag ko sine mein chhupana chaha

apne aibon ko chhupane ke liye duniya mein

main ne har shaKHs pe ilzam lagana chaha

ghairat-e-mauj use phenk gai sahil par

Dubne wale ne jab shor machana chaha