haal-e-KHud-agahi kab tujhse nihan hai saqi

hāl-e-ḳhud-āgahī kab tujh se nihāñ hai saaqī

zarf har chiiz kā sūrat se 'ayāñ hai saaqī

fikr-e-mastī hī faqat tujh ko girāñ hai saaqī

varna hastī kā mujhe hosh kahāñ hai saaqī

paikar-e-husn kī tasvīr hai mere dam se

dil hai bedār nazar merī javāñ hai saaqī

gard hai paikar-e-kaunain kī ḳhud-ārā.ī

aaj rag rag meñ mai-e-hosh ravāñ hai saaqī

mudda'ā kahne ko betāb huā baiThā huuñ

āḳhir insāñ huuñ mire muñh meñ zabāñ hai saaqī

jām-o-mīnā haiñ tire lutf-o-karam ke mus.haf

surḳhī-e-mai meñ yahī raaz nihāñ hai saaqī

rang-e-gul naġhma-e-qulqul va fusūñ-kārī meñ

terī mahfil kī har ik chiiz javāñ hai saaqī

mudda'ī hosh ke sab gum haiñ tire jalvoñ meñ

kis tarah samjhe koī kaun kahāñ hai saaqī

aaj tak raaz na is manzil-e-rangīñ kā khulā

ik jahāñ jis kī masāfat meñ ravāñ hai saaqī

bazm-e-zāhir se tirī 'shād' hai 'ālam lekin

dil parakhne kā vo sāmān kahāñ hai saaqī

haal-e-KHud-agahi kab tujh se nihan hai saqi

zarf har chiz ka surat se 'ayan hai saqi

fikr-e-masti hi faqat tujh ko giran hai saqi

warna hasti ka mujhe hosh kahan hai saqi

paikar-e-husn ki taswir hai mere dam se

dil hai bedar nazar meri jawan hai saqi

gard hai paikar-e-kaunain ki KHud-arai

aaj rag rag mein mai-e-hosh rawan hai saqi

mudda'a kahne ko betab hua baiTha hun

aaKHir insan hun mere munh mein zaban hai saqi

jam-o-mina hain tere lutf-o-karam ke mushaf

surKHi-e-mai mein yahi raaz nihan hai saqi

rang-e-gul naghma-e-qulqul wa fusun-kari mein

teri mahfil ki har ek chiz jawan hai saqi

mudda'i hosh ke sab gum hain tere jalwon mein

kis tarah samjhe koi kaun kahan hai saqi

aaj tak raaz na is manzil-e-rangin ka khula

ek jahan jis ki masafat mein rawan hai saqi

bazm-e-zahir se teri 'shad' hai 'alam lekin

dil parakhne ka wo saman kahan hai saqi