haal hawa jab puchhne aai hum majburon se

haal havā jab pūchhne aa.ī ham majbūroñ se

koī baat kahāñ ban paa.ī ham majbūroñ se

aaj sabhī dukh aañsū ban kar aañkh meñ tair ga.e

khel rahī thī khel ḳhudā.ī ham majbūroñ se

vo be-parda vo be-parvā vo yak-sur yak-tāl

baat kare yā vo harjā.ī ham majbūroñ se

paañv toḌ ke baiTh rahe haiñ raah ke patthar bhī

chaah rahe the rahh-numā.ī ham majbūroñ se

kis aahaT kī bahār se pag pag dhuul ke phuul khile

kis mausam ne Thokar khaa.ī ham majbūroñ se

kis ke lams ke aks-numā haiñ ḳhushbū ke jhoñke

pūchh na baiThe gul-e-sahrā.ī ham majbūroñ se

baal nichoḌ ke jhaTke kis ne dukh ke dal-bādal

pūchh rahī hai ye purvā.ī ham majbūroñ se

dard ke ruḳh darvāze rakheñ chāñd ke ruḳh khiḌkī

kaash kirā.e vo chunvā.ī ham majbūroñ se

kār-e-numū āġhāz rahegā gor ho yā gulshan

rut ne sīkhī gul-ārā.ī ham majbūroñ se

āñkheñ hoñToñ ke taale bhī khulte dekheñgī

duniyā chhīn to le goyā.ī ham majbūroñ se

raah dikhāne vaale kis din kis pal aa pahuñcheñ

kab chhin jaa.e ye bīnā.ī ham majbūroñ se

nūr-e-charāġh tāq-e-taġhāful dil tārīk na kar

bol kuchh ai māh-e-yaktā.ī ham majbūroñ se

zahr-piyāla pī lo 'ḳhālid' sulag uTho 'ḳhālid'

kyā kyā kahtī thī shahnā.ī ham majbūroñ se

haal hawa jab puchhne aai hum majburon se

koi baat kahan ban pai hum majburon se

aaj sabhi dukh aansu ban kar aankh mein tair gae

khel rahi thi khel KHudai hum majburon se

wo be-parda wo be-parwa wo yak-sur yak-tal

baat kare ya wo harjai hum majburon se

panw toD ke baiTh rahe hain rah ke patthar bhi

chah rahe the rahh-numai hum majburon se

kis aahaT ki bahaar se pag pag dhul ke phul khile

kis mausam ne Thokar khai hum majburon se

kis ke lams ke aks-numa hain KHushbu ke jhonke

puchh na baiThe gul-e-sahrai hum majburon se

baal nichoD ke jhaTke kis ne dukh ke dal-baadal

puchh rahi hai ye purwai hum majburon se

dard ke ruKH darwaze rakhen chand ke ruKH khiDki

kash kirae wo chunwai hum majburon se

kar-e-numu aaghaz rahega gor ho ya gulshan

rut ne sikhi gul-arai hum majburon se

aankhen honTon ke tale bhi khulte dekhengi

duniya chhin to le goyai hum majburon se

rah dikhane wale kis din kis pal aa pahunchen

kab chhin jae ye binai hum majburon se

nur-e-charagh taq-e-taghaful dil tarik na kar

bol kuchh ai mah-e-yaktai hum majburon se

zahr-piyala pi lo 'KHalid' sulag uTho 'KHalid'

kya kya kahti thi shahnai hum majburon se