حال میرا مہرباں تو یوں سر محفل نہ پوچھ

حال میرا مہرباں تو یوں سر محفل نہ پوچھ

راز ہے یہ دوست کا کیوں ہو گیا غافل نہ پوچھ

زندگی بخشی ہے تو نے یہ ترا احسان ہے

کیا دیا اس زندگی نے کیا ہوا حاصل نہ پوچھ

روز و شب کی ڈایری تیرے یہاں موجود ہے

اب حساب زندگی اے مالک عادل نہ پوچھ

خون کی رنگت بتا دیتی ہے قاتل کا پتہ

ایک بسمل سے خدا را کوچۂ قاتل نہ پوچھ

پہلے تو چھوٹا وطن اب چھوڑے جاتی ہوں جہاں

تھی کہاں منزل مری ہوگی کہاں منزل نہ پوچھ

اک ہوا کی بے رخی نے کر دیا قصہ تمام

ڈگمگائی جوں ہی کشتی حسرت ساحل نہ پوچھ

شمع محفل میں جلی تو ہو گیا روشن جہاں

شمع جس دم بجھ گئی ہنگامۂ محفل نہ پوچھ

بھول کر بھی اک نظر اے شوخ بے پروا ادھر

اب نسیمؔ خستہ سے تو اضطراب دل نہ پوچھ