haal mera mehrban tu yun sar-e-mahfil na puchh

haal merā mehrbāñ tū yuuñ sar-e-mahfil na pūchh

raaz hai ye dost kā kyuuñ ho gayā ġhāfil na pūchh

zindagī baḳhshī hai tū ne ye tirā ehsān hai

kyā diyā is zindagī ne kyā huā hāsil na pūchh

roz-o-shab kī diary tere yahāñ maujūd hai

ab hisāb-e-zindagī ai mālik-e-ādil na pūchh

ḳhuun kī rangat batā detī hai qātil kā pata

ek bismil se ḳhudā-rā kūcha-e-qātil na pūchh

pahle to chhūTā vatan ab chhoḌe jaatī huuñ jahāñ

thī kahāñ manzil mirī hogī kahāñ manzil na pūchh

ik havā kī be-ruḳhī ne kar diyā qissa tamām

Dagmagā.ī juuñ hī kashtī hasrat-e-sāhil na pūchh

sham.a mahfil meñ jalī to ho gayā raushan jahāñ

sham.a jis dam bujh ga.ī hangāma-e-mahfil na pūchh

bhuul kar bhī ik nazar ai shoḳh be-parvā idhar

ab ‘nasīm’-e-ḳhasta se tū iztirāb-e-dil na pūchh

haal mera mehrban tu yun sar-e-mahfil na puchh

raaz hai ye dost ka kyun ho gaya ghafil na puchh

zindagi baKHshi hai tu ne ye tera ehsan hai

kya diya is zindagi ne kya hua hasil na puchh

roz-o-shab ki diary tere yahan maujud hai

ab hisab-e-zindagi ai malik-e-adil na puchh

KHun ki rangat bata deti hai qatil ka pata

ek bismil se KHuda-ra kucha-e-qatil na puchh

pahle to chhuTa watan ab chhoDe jati hun jahan

thi kahan manzil meri hogi kahan manzil na puchh

ek hawa ki be-ruKHi ne kar diya qissa tamam

Dagmagai jun hi kashti hasrat-e-sahil na puchh

shama mahfil mein jali to ho gaya raushan jahan

shama jis dam bujh gai hangama-e-mahfil na puchh

bhul kar bhi ek nazar ai shoKH be-parwa idhar

ab ‘nasim’-e-KHasta se tu iztirab-e-dil na puchh