حال پوچھے جو کوئی میرا بتا بھی نا سکوں

حال پوچھے جو کوئی میرا بتا بھی نا سکوں

کیا قیامت ہے کہ میں ہونٹ ہلا بھی نہ سکوں

اف یہ مجبوری ایام کا عالم ہمدم

رہ گزاران شب غم کو جگا بھی نہ سکوں

اے جنوں حیف مری سوختہ سامانی پر

وقت کو موت کی تعبیر بتا بھی نہ سکوں

سوچتا ہوں روش خام پہ ماتم کر لوں

بجلیاں آئیں تو سینے سے لگا بھی نہ سکوں

ٹھہر جا گردش دوراں کہ میں ایسا تو نہیں

برق کی زد یہ نشیمن جو بنا بھی نہ سکوں

اب تو اللہ نگہباں ہے وفا کیشوں کا

چوٹ کھائی ہے کچھ ایسی کہ دکھا بھی نہ سکوں

دل شکستہ ہوں بہت گردش دوراں ہے مگر

اس سے کٹ کر کوئی کاشانہ بنا بھی نہ سکوں

کتنی مجبوری ہے اے دوست کہ غم خواروں کو

غم ایام کی تفصیل بتا بھی نہ سکوں

کتنی باتیں ہیں سنانے کی مگر اے نازشؔ

ہائے چاہوں جو سنانا تو سنا بھی نہ سکوں