haalat ke kohna dar-o-diwar se niklen

hālāt ke kohna dar-o-dīvār se nikleñ

duniyā ko badalnā hai to ghar-bār se nikleñ

nākām sadāoñ ke haiñ aaseb yahāñ par

is dasht-e-tamannā se to raftār se nikleñ

jin meñ ho mohabbat kā uḳhuvvat kā ishāra

paiġhām kuchh aise bhī to aḳhbār se nikleñ

duniyā bhī to ban saktī hai jannat kā namūna

ham apnī anā apne hī pindār se nikleñ

jo haqq-o-sadāqat kā sabaq bhuul ga.e haiñ

vo kaise bhalā vaqt ke āzār se nikleñ

ham ne bhī bahāroñ ko lahū apnā diyā hai

ab ham se hī kahte ho ki gulzār se nikleñ

is darja taġhāful hai to ham ne bhī ye sochā

ummīd-e-karam hasrat-e-dīdār se nikleñ

har ek qadam par hai yahāñ jaan kā ḳhatra

ab soch samajh kar zarā bāzār se nikleñ

aage hī nikalnā hai jo 'shāyān' se un ko

aḳhlāq se a.amāl se kirdār se nikleñ

haalat ke kohna dar-o-diwar se niklen

duniya ko badalna hai to ghar-bar se niklen

nakaam sadaon ke hain aaseb yahan par

is dasht-e-tamanna se to raftar se niklen

jin mein ho mohabbat ka uKHuwwat ka ishaara

paigham kuchh aise bhi to aKHbar se niklen

duniya bhi to ban sakti hai jannat ka namuna

hum apni ana apne hi pindar se niklen

jo haqq-o-sadaqat ka sabaq bhul gae hain

wo kaise bhala waqt ke aazar se niklen

hum ne bhi bahaaron ko lahu apna diya hai

ab hum se hi kahte ho ki gulzar se niklen

is darja taghaful hai to hum ne bhi ye socha

ummid-e-karam hasrat-e-didar se niklen

har ek qadam par hai yahan jaan ka KHatra

ab soch samajh kar zara bazar se niklen

aage hi nikalna hai jo 'shayan' se un ko

aKHlaq se aamal se kirdar se niklen