haalat ki chiKHon pe kabhi kan dharenge

hālāt kī chīḳhoñ pe kabhī kaan dhareñge

har ḳhauf meñ sahmī huī āvāz suneñge

ye lāzim-o-malzūm nahīñ hosh meñ aa.uuñ

kab ḳhamr thī āñkheñ haiñ ka.ī roz lageñge

aflāk se lauTī hai duā aa ke zarā dekh

har harf ke chehre pe tujhe sog dikheñge

nā amn kī ḳhvāhish ko kabhī ḳhauf samajhnā

maidāñ meñ hameñ dekh tire hosh uḌeñge

bāñTā hai mujhe hijr ne TukḌoñ meñ ki merī

āñkheñ haiñ kahīñ par to kahīñ ḳhvāb mileñge

pahlū se uThe dard ne āñkhoñ meñ jagah lī

afsos tujhe niiñd yahāñ kaun sī jā deñ

do-chār qadam aañkh ko āñkhoñ se milā kar

ab ḳhvāb haqīqat kī asīrī kā kaheñge

ai ishq tire dar pe milī mar ke bulandī

shah-e-rag pe tujhe zinda-o-jāved likheñge

ye jañg ajab jañg hai laḌnā na kabhī bhī

is ishq ke maidāñ meñ jiyeñge na mareñge

tum dil meñ chhupāo na kaho aag lagegī

ash.ār ke dāman meñ kahāñ dard chhupeñge

ham zabt 'ḳhalīl' oḌh ke zaḳhmoñ pe ka.ī baar

har aah ke siine pe qadam rakh ke hañseñge

haalat ki chiKHon pe kabhi kan dharenge

har KHauf mein sahmi hui aawaz sunenge

ye lazim-o-malzum nahin hosh mein aaun

kab KHamr thi aankhen hain kai roz lagenge

aflak se lauTi hai dua aa ke zara dekh

har harf ke chehre pe tujhe sog dikhenge

na amn ki KHwahish ko kabhi KHauf samajhna

maidan mein hamein dekh tere hosh uDenge

banTa hai mujhe hijr ne TukDon mein ki meri

aankhen hain kahin par to kahin KHwab milenge

pahlu se uThe dard ne aankhon mein jagah li

afsos tujhe nind yahan kaun si ja den

do-chaar qadam aankh ko aankhon se mila kar

ab KHwab haqiqat ki asiri ka kahenge

ai ishq tere dar pe mili mar ke bulandi

shah-e-rag pe tujhe zinda-o-jawed likhenge

ye jang ajab jang hai laDna na kabhi bhi

is ishq ke maidan mein jiyenge na marenge

tum dil mein chhupao na kaho aag lagegi

ashaar ke daman mein kahan dard chhupenge

hum zabt 'KHalil' oDh ke zaKHmon pe kai bar

har aah ke sine pe qadam rakh ke hansenge