haalat mere dil ko lagane nahin dete

hālāt mire dil ko lagāne nahīñ dete

āñkhoñ meñ tire ḳhvāb sajāne nahīñ dete

zulmat ke pujārī to bahut tañg-nazar haiñ

jashn-e-shab-e-tārīk manāne nahīñ dete

āñkhoñ pe to bilkul hī koī bas nahīñ chaltā

ham ḳhud ko tirī bazm meñ jaane nahīñ dete

jannat kī duā.eñ mujhe dete haiñ sabhī log

is ahd meñ jiine ke bahāne nahīñ dete

nafrat kī rivāyāt ke pāband haiñ lahje

rūThe hue logoñ ko manāne nahīñ dete

kuchh ḳhvāb mirī zaat se baḌh kar bhī to haiñ jo

phir dil ko tirī aas lagāne nahīñ dete

sūkhe hue phuul aur tire lams kī ḳhushbū

sadma tire jaane kā bhulāne nahīñ dete

goyā.ī hai pāband-e-salāsil ki 'amīr' ab

sahrā meñ bhī āvāz lagāne nahīñ dete

haalat mere dil ko lagane nahin dete

aankhon mein tere KHwab sajaane nahin dete

zulmat ke pujari to bahut tang-nazar hain

jashn-e-shab-e-tarik manane nahin dete

aankhon pe to bilkul hi koi bas nahin chalta

hum KHud ko teri bazm mein jaane nahin dete

jannat ki duaen mujhe dete hain sabhi log

is ahd mein jine ke bahane nahin dete

nafrat ki riwayat ke paband hain lahje

ruThe hue logon ko manane nahin dete

kuchh KHwab meri zat se baDh kar bhi to hain jo

phir dil ko teri aas lagane nahin dete

sukhe hue phul aur tere lams ki KHushbu

sadma tere jaane ka bhulane nahin dete

goyai hai paband-e-salasil ki 'amir' ab

sahra mein bhi aawaz lagane nahin dete