ek naghma ek tara ek ghuncha ek jam

ek naġhma ek taarā ek ġhuncha ek jaam

ai ġham-e-daurāñ ġham-e-daurāñ tujhe merā salām

zulf āvāra garebāñ chaak ghabrā.ī nazar

in dinoñ ye hai jahāñ meñ zindagānī kā nizām

chand taare TuuT kar dāman meñ mere aa gire

maiñ ne pūchhā thā sitāroñ se tire ġham kā maqām

kah rahe haiñ chand bichhḌe rahravoñ ke naqsh-e-pā

ham kareñge inqalāb-e-justujū kā ehtimām

paḌ ga.iiñ pairāhan-e-sub.h-e-chaman par silvaTeñ

yaad aa kar rah ga.ī hai be-ḳhudī kī ek shaam

terī ismat ho ki ho mere hunar kī chāñdnī

vaqt ke bāzār meñ har chiiz ke lagte haiñ daam

ham banā.eñge yahāñ 'sāġhar' na.ī tasvīr-e-shauq

ham taḳhayyul ke mujaddid ham tasavvur ke imaam

ek naghma ek tara ek ghuncha ek jam

ai gham-e-dauran gham-e-dauran tujhe mera salam

zulf aawara gareban chaak ghabrai nazar

in dinon ye hai jahan mein zindagani ka nizam

chand tare TuT kar daman mein mere aa gire

main ne puchha tha sitaron se tere gham ka maqam

kah rahe hain chand bichhDe rahrawon ke naqsh-e-pa

hum karenge inqalab-e-justuju ka ehtimam

paD gain pairahan-e-subh-e-chaman par silwaTen

yaad aa kar rah gai hai be-KHudi ki ek sham

teri ismat ho ki ho mere hunar ki chandni

waqt ke bazar mein har chiz ke lagte hain dam

hum banaenge yahan 'saghar' nai taswir-e-shauq

hum taKHayyul ke mujaddid hum tasawwur ke imam