haalat nahin hai Thik abhi gulsitan ki

hālat nahīñ hai Thiik abhī gulsitān kī

āb-o-havā hai bigḌī huī is jahān kī

'izzat jo us ko detī thī detī nahīñ hai ab

tahqīr kar rahī hai zamīñ āsmān kī

mausam bahut hai saḳht ye us ko ḳhabar nahīñ

baiThā hai fikr meñ jo parinda uḌaan kī

har-sū chaman meñ hotā hai phūloñ kā qatl-e-'ām

is par nazar nahīñ hai magar bāġhbān kī

phailānā ham ko haath nahīñ hai miyāñ pasand

lete nahīñ haiñ ham to koī chiiz daan kī

sahrā meñ kaun zikr-e-ilāhī meñ mahv hai

ḳhushbū yahāñ hai bikhrī huī zā'frān kī

in se zamīñ ke baare meñ kyā pūchhte ho tum

pūchho qalandaroñ se ḳhabar āsmān kī

āvāz sun ke merī vo ruk jā.egā 'qamar'

ye baat ho bhī saktī hai mere gumān kī

haalat nahin hai Thik abhi gulsitan ki

aab-o-hawa hai bigDi hui is jahan ki

'izzat jo us ko deti thi deti nahin hai ab

tahqir kar rahi hai zamin aasman ki

mausam bahut hai saKHt ye us ko KHabar nahin

baiTha hai fikr mein jo parinda uDan ki

har-su chaman mein hota hai phulon ka qatl-e-'am

is par nazar nahin hai magar baghban ki

phailana hum ko hath nahin hai miyan pasand

lete nahin hain hum to koi chiz dan ki

sahra mein kaun zikr-e-ilahi mein mahw hai

KHushbu yahan hai bikhri hui za'fran ki

in se zamin ke bare mein kya puchhte ho tum

puchho qalandaron se KHabar aasman ki

aawaz sun ke meri wo ruk jaega 'qamar'

ye baat ho bhi sakti hai mere guman ki