حالت نہیں ہے ٹھیک ابھی گلستان کی

حالت نہیں ہے ٹھیک ابھی گلستان کی

آب و ہوا ہے بگڑی ہوئی اس جہان کی

عزت جو اس کو دیتی تھی دیتی نہیں ہے اب

تحقیر کر رہی ہے زمیں آسمان کی

موسم بہت ہے سخت یہ اس کو خبر نہیں

بیٹھا ہے فکر میں جو پرندہ اڑان کی

ہر سو چمن میں ہوتا ہے پھولوں کا قتل عام

اس پر نظر نہیں ہے مگر باغبان کی

پھیلانا ہم کو ہاتھ نہیں ہے میاں پسند

لیتے نہیں ہیں ہم تو کوئی چیز دان کی

صحرا میں کون ذکر الٰہی میں محو ہے

خوشبو یہاں ہے بکھری ہوئی زعفران کی

ان سے زمیں کے بارے میں کیا پوچھتے ہو تم

پوچھو قلندروں سے خبر آسمان کی

آواز سن کے میری وہ رک جائے گا قمرؔ

یہ بات ہو بھی سکتی ہے میرے گمان کی