ہاں بنا اپنی جلوہ گاہ مجھے

ہاں بنا اپنی جلوہ گاہ مجھے

لوگ تیرا کہیں گواہ مجھے

کوئی کیوں پوچھتا نہیں ان سے

کس نے دی فرصت گناہ مجھے

میرے دل سے بچائیو للہ

کر نہ دے یہ کہیں تباہ مجھے

گزرے طوفان سے نہیں وہ مگر

جو سمجھتے ہیں مشت کاہ مجھے

خود ہی کر کے مجھے بہشت بدر

خاکداں کی دکھائی راہ مجھے

یاد سے تیری کر نہ دیں غافل

دوست احباب مال و جاہ مجھے

میری عادت نہیں بلا نوشی

مست کرتی ہے اک نگاہ مجھے

ہر قدم گو ہے حوصلہ فرسا

طے کرائے گا شوق راہ مجھے

بے حیاؤں سے بے وفاؤں سے

کچھ ضروری نہیں نباہ مجھے