han gham-e-dil ki tere pas dawa hai to sahi

haañ ġham-e-dil kī tire paas davā hai to sahī

dard kuchh terī tavajjoh se sivā hai to sahī

mūjib-e-rāhat-e-dil terī vafā hai to sahī

kuchh na kuchh phir bhī mujhe tujh se gila hai to sahī

dil ko matlūb hai ik chiiz shifā se bhī sivā

varna yuuñ dard-e-mohabbat kī davā hai to sahī

maiñ na kahtā thā is āvāz se mānūs huuñ maiñ

parda-e-sāz meñ terī hī sadā hai to sahī

ab na khā.ūñgā tirī chashm-e-muravvat kā fareb

merī nazroñ meñ tirī tarz-e-jafā hai to sahī

ek duniyā hai ki betāb paḌī phirtī hai

kuchh na kuchh dard-e-mohabbat meñ mazā hai to sahī

aur darkār hai kyā dil kī tasallī ke liye

mujh se vo shoḳh ka.ī din se ḳhafā hai to sahī

sach hai kab tak rahe ummīd pe koī ai dil

ab tirī barhamī-e-shauq bajā hai to sahī

vaah kyā paa.ī hai rangīn tabī.at maiñ ne

kam kahūñ sher magar tab-e-rasā hai to sahī

aap ke lutf kī ummīd pe jiitā hai 'jalīl'

varna sunte haiñ vo jiine se ḳhafā hai to sahī

han gham-e-dil ki tere pas dawa hai to sahi

dard kuchh teri tawajjoh se siwa hai to sahi

mujib-e-rahat-e-dil teri wafa hai to sahi

kuchh na kuchh phir bhi mujhe tujh se gila hai to sahi

dil ko matlub hai ek chiz shifa se bhi siwa

warna yun dard-e-mohabbat ki dawa hai to sahi

main na kahta tha is aawaz se manus hun main

parda-e-saz mein teri hi sada hai to sahi

ab na khaunga teri chashm-e-murawwat ka fareb

meri nazron mein teri tarz-e-jafa hai to sahi

ek duniya hai ki betab paDi phirti hai

kuchh na kuchh dard-e-mohabbat mein maza hai to sahi

aur darkar hai kya dil ki tasalli ke liye

mujh se wo shoKH kai din se KHafa hai to sahi

sach hai kab tak rahe ummid pe koi ai dil

ab teri barhami-e-shauq baja hai to sahi

wah kya pai hai rangin tabiat main ne

kam kahun sher magar tab-e-rasa hai to sahi

aap ke lutf ki ummid pe jita hai 'jalil'

warna sunte hain wo jine se KHafa hai to sahi