han mera haal hai barbaad magar main to nahin

haañ mirā haal hai barbād magar maiñ to nahīñ

tujh ko kartā hai koī yaad magar maiñ to nahīñ

bārhā ḳhāliq-e-kaunain tirī ḳhidmat meñ

pahuñchī hogī mirī fariyād magar maiñ to nahīñ

ahd-e-hāzir meñ lage misr ke bāzāroñ meñ

bik ga.ī hai mirī rūdād magar maiñ to nahīñ

kaash hastī bhī mirī daad ke qābil hotī

sher lete haiñ mire daad magar maiñ to nahīñ

mohtaram log mujhe fan ke sabab jānte haiñ

mohtaram haiñ mire ustād magar maiñ to nahīñ

dast-e-haidar se ġhulāmī kī sanad jin ko milī

hoñge vo hazrat-e-miqdād magar maiñ to nahīñ

saal ke saath badalnā nahīñ aatā 'kāzim'

haañ badal jaate haiñ a.adād magar maiñ to nahīñ

han mera haal hai barbaad magar main to nahin

tujh ko karta hai koi yaad magar main to nahin

barha KHaliq-e-kaunain teri KHidmat mein

pahunchi hogi meri fariyaad magar main to nahin

ahd-e-hazir mein lage misr ke bazaron mein

bik gai hai meri rudad magar main to nahin

kash hasti bhi meri dad ke qabil hoti

sher lete hain mere dad magar main to nahin

mohtaram log mujhe fan ke sabab jaante hain

mohtaram hain mere ustad magar main to nahin

dast-e-haidar se ghulami ki sanad jin ko mili

honge wo hazrat-e-miqdad magar main to nahin

sal ke sath badalna nahin aata 'kazim'

han badal jate hain aadad magar main to nahin