han saqi-e-mastana bhar de mera paimana

haañ sāqī-e-mastāna bhar de mirā paimāna

ghanghor ghaTā hai yā uḌtā huā mai-ḳhāna

hotī haiñ shab-e-ġham meñ yuuñ dil se mirī bāteñ

jis tarah se samjhā.e dīvāne ko dīvāna

kyā tum ne kahā dil se kyā dil ne kahā ham se

baiTho to sunā.eñ ham ik roz ye afsāna

ġhusse meñ jo dī gaalī muñh chuum liyā maiñ ne

zālim ne kahā ye kyā maiñ ne kahā jurmāna

mutrib se ye kahtā thā 'hashr' apnī ġhazal sun kar

hai merī javānī kā bhūlā huā afsāna

han saqi-e-mastana bhar de mera paimana

ghanghor ghaTa hai ya uDta hua mai-KHana

hoti hain shab-e-gham mein yun dil se meri baaten

jis tarah se samjhae diwane ko diwana

kya tum ne kaha dil se kya dil ne kaha hum se

baiTho to sunaen hum ek roz ye afsana

ghusse mein jo di gali munh chum liya main ne

zalim ne kaha ye kya main ne kaha jurmana

mutrib se ye kahta tha 'hashr' apni ghazal sun kar

hai meri jawani ka bhula hua afsana