han yahi shahr mere KHwabon ka gahwara tha

haañ yahī shahr mire ḳhvāboñ kā gahvāra thā

inhī galiyoñ meñ kahīñ merā sanam-ḳhāna thā

isī dhartī pe the ābād saman-zār mire

isī bastī meñ mirī ruuh kā sarmāya thā

thī yahī āb-o-havā nashv-o-numā kī zāmin

isī miTTī se mire fan kā ḳhamīr uTThā thā

ab na dīvāroñ se nisbat hai na bām-o-dar se

kyā isī ghar se kabhī merā koī rishta thā

zaḳhm yādoñ ke sulagte haiñ mirī āñkhoñ meñ

ḳhvāb in āñkhoñ ne kyā jāniye kyā dekhā thā

mehrbāñ raat ke saa.e the munavvar aise

ashk āñkhoñ meñ liye dil ye sarāsīma thā

ajnabī lagte the sab kūcha o bāzār 'akbar'

ġhaur se dekhā to vo shahr mirā apnā thā

han yahi shahr mere KHwabon ka gahwara tha

inhi galiyon mein kahin mera sanam-KHana tha

isi dharti pe the aabaad saman-zar mere

isi basti mein meri ruh ka sarmaya tha

thi yahi aab-o-hawa nashw-o-numa ki zamin

isi miTTi se mere fan ka KHamir uTTha tha

ab na diwaron se nisbat hai na baam-o-dar se

kya isi ghar se kabhi mera koi rishta tha

zaKHm yaadon ke sulagte hain meri aankhon mein

KHwab in aankhon ne kya jaaniye kya dekha tha

mehrban raat ke sae the munawwar aise

ashk aankhon mein liye dil ye sarasima tha

ajnabi lagte the sab kucha o bazar 'akbar'

ghaur se dekha to wo shahr mera apna tha