hasil dil-e-tabah ko rahat kabhi na ho

hāsil dil-e-tabāh ko rāhat kabhī na ho

ham ko ġham-e-firāq se fursat kabhī na ho

ab chauñktā nahīñ huuñ tumhāre sitam pe maiñ

ye bhī hai kyā maqām ki hairat kabhī na ho

gar hāl-e-dil sunā.eñ to kis ko sunā.iye

aisī to dushmanoñ kī bhī qismat kabhī na ho

ghabrā ke hādsāt se dāman bachā sake

itnī dil-e-tabāh kī jur.at kabhī na ho

ham muntazir hoñ aur gurezāñ hoñ bijliyāñ

aisī nigāh-e-nāz qayāmat kabhī na ho

qaa.em rahe ye rabt ġham-o-dard se 'nishā'

socheñ agar mafar kī bhī sūrat kabhī na ho

hasil dil-e-tabah ko rahat kabhi na ho

hum ko gham-e-firaq se fursat kabhi na ho

ab chaunkta nahin hun tumhaare sitam pe main

ye bhi hai kya maqam ki hairat kabhi na ho

gar haal-e-dil sunaen to kis ko sunaiye

aisi to dushmanon ki bhi qismat kabhi na ho

ghabra ke hadsat se daman bacha sake

itni dil-e-tabah ki jurat kabhi na ho

hum muntazir hon aur gurezan hon bijliyan

aisi nigah-e-naz qayamat kabhi na ho

qaem rahe ye rabt gham-o-dard se 'nisha'

sochen agar mafar ki bhi surat kabhi na ho