hasil-e-arz-e-muddaa kya tha

hāsil-e-'arz-e-mudda'ā kyā thā

sang-dil pe asar huā kyā thā

kuchh mirā dil hī rakh liyā hotā

varna ‘ahd-e-vafā tirā kyā thā

ham na sajda tujhe agar karte

ai sanam terā martaba kyā thā

yaad aane lagā musībat meñ

varna 'ishrat meñ vo ḳhudā kyā thā

har kahā aap kā sar āñkhoñ par

dūsrā kuchh bhī rāsta kyā thā

achchhoñ kī dekh lī hai achchhā.ī

ab buroñ meñ batā burā kyā thā

un kī nazr-e-karam huī tujh par

varna tū ai 'sadā' batā kyā thā

hasil-e-'arz-e-mudda'a kya tha

sang-dil pe asar hua kya tha

kuchh mera dil hi rakh liya hota

warna ‘ahd-e-wafa tera kya tha

hum na sajda tujhe agar karte

ai sanam tera martaba kya tha

yaad aane laga musibat mein

warna 'ishrat mein wo KHuda kya tha

har kaha aap ka sar aankhon par

dusra kuchh bhi rasta kya tha

achchhon ki dekh li hai achchhai

ab buron mein bata bura kya tha

un ki nazr-e-karam hui tujh par

warna tu ai 'sada' bata kya tha