حاصل جوش جنوں بے سر و ساماں ہونا

حاصل جوش جنوں بے سر و ساماں ہونا

دشت پر خار میں اک پیکر عریاں ہونا

رونق عشق ہے خاک در جاناں ہونا

زینت حسن ہے زلفوں کا پریشاں ہونا

عشق میں چشم کی معراج ہے گریاں ہونا

رفعت اشک ہے زیب سر داماں ہونا

لذت درد ہے بیگانۂ درماں ہونا

زندگی زخم کی ہے رہن نمکداں ہونا

جنت ذوق نظر ہے دم آرائش حسن

زلف و شانہ کا بہم دست و گریباں ہونا

موت دنیا میں ہے احساں طلبی سے بہتر

دیکھ دے درد نہ منت کش درماں ہونا

ہے دو رنگیٔ زمانہ کی مجسم تصویر

پھول کا پیرہن برگ سے عریاں ہونا

اف ترے جلوۂ بے باک کے آگے ظالم

چاک دامان خرد تا بہ گریباں ہونا

شغل آنکھوں کا ہے پہلو میں جگر خوں کرنا

کھیل پلکوں کا ہے نشتر بہ رگ جاں ہونا

وہ یکایک دم آخر مرا ہچکی لینا

وہ اچانک تری زلفوں کا پریشاں ہونا

وہ ترا جوش میں انگڑائی ادا سے لینا

وہ مرا خاک بہ سر چاک گریباں ہونا

وہ ترا ایک جھلک مجھ کو دکھا کر چھپنا

وہ مرے دیدۂ پر شوق کا حیراں ہونا

بال بکھرائے ترا بستر گل پر سونا

چاندنی کا وہ نثار رخ تاباں ہونا

کالی زلفوں کا بکھرنا ترے رخساروں پر

میرے شیرازۂ خاطر کا پریشاں ہونا

ایک دنیائے تمنا تھا ترے شوق میں دل

خوں رلاتا ہے اب اس گھر کا بیاباں ہونا

اٹھ چلے جلوہ گہہ ناز کے رنگیں پردے

جذبۂ شوق ذرا سلسلہ جنباں ہونا

اے ولیؔ چین تہ قبر بھی دے گا نہ مجھے

میرے مرنے پہ ستم گر کا پشیماں ہونا