hasil-e-josh-e-junun be-sar-o-saman hona

hāsil-e-josh-e-junūñ be-sar-o-sāmāñ honā

dasht-e-pur-ḳhār meñ ik paikar-e-uryāñ honā

raunaq-e-ishq hai ḳhāk-e-dar-e-jānāñ honā

zīnat-e-husn hai zulfoñ kā pareshāñ honā

ishq meñ chashm kī me.arāj hai giryāñ honā

rif.at-e-ashk hai zeb-e-sar-e-dāmāñ honā

lazzat-e-dard hai begāna-e-darmāñ honā

zindagī zaḳhm kī hai rehn-e-namak-dāñ honā

jannat-e-zauq-e-nazar hai dam-e-ārā.ish-e-husn

zulf-o-shāna kā baham dast-o-garebāñ honā

maut duniyā meñ hai ehsāñ-talabī se behtar

dekh de dard na minnat-kash-e-darmāñ honā

hai do-rangī-e-zamāna kī mujassam tasvīr

phuul kā pairahan-e-barg se uryāñ honā

uf tire jalva-e-bebāk ke aage zālim

chaak dāmān-e-ḳhirad tā-ba-garebāñ honā

shaġhl āñkhoñ kā hai pahlū meñ jigar ḳhuuñ karnā

khel palkoñ kā hai nashtar-ba-rag-e-jāñ honā

vo yakāyak dam-e-āḳhir mirā hichkī lenā

vo achānak tirī zulfoñ kā pareshāñ honā

vo tirā josh meñ añgḌā.ī adā se lenā

vo mirā ḳhāk-ba-sar chāk-garebāñ honā

vo tirā ek jhalak mujh ko dikhā kar chhupnā

vo mire dīda-e-pur-shauq kā hairāñ honā

baal bikhrā.e tirā bistar-e-gul par sonā

chāñdnī kā vo nisār-e-ruḳh-e-tābāñ honā

kaalī zulfoñ kā bikharnā tire ruḳhsāroñ par

mere shīrāza-e-ḳhātir kā pareshāñ honā

ek duniyā-e-tamannā thā tire shauq meñ dil

ḳhuuñ rulātā hai ab is ghar kā bayābāñ honā

uTh chale jalva-gah-e-nāz ke rangīñ parde

jazba-e-shauq zarā silsila-jumbāñ honā

ai 'valī' chain tah-e-qabr bhī degā na mujhe

mere marne pe sitamgar kā pashemāñ honā

hasil-e-josh-e-junun be-sar-o-saman hona

dasht-e-pur-KHar mein ek paikar-e-uryan hona

raunaq-e-ishq hai KHak-e-dar-e-jaanan hona

zinat-e-husn hai zulfon ka pareshan hona

ishq mein chashm ki mearaj hai giryan hona

rifat-e-ashk hai zeb-e-sar-e-daman hona

lazzat-e-dard hai begana-e-darman hona

zindagi zaKHm ki hai rehn-e-namak-dan hona

jannat-e-zauq-e-nazar hai dam-e-araish-e-husn

zulf-o-shana ka baham dast-o-gareban hona

maut duniya mein hai ehsan-talabi se behtar

dekh de dard na minnat-kash-e-darman hona

hai do-rangi-e-zamana ki mujassam taswir

phul ka pairahan-e-barg se uryan hona

uf tere jalwa-e-bebak ke aage zalim

chaak daman-e-KHirad ta-ba-gareban hona

shaghl aankhon ka hai pahlu mein jigar KHun karna

khel palkon ka hai nashtar-ba-rag-e-jaan hona

wo yakayak dam-e-aKHir mera hichki lena

wo achanak teri zulfon ka pareshan hona

wo tera josh mein angDai ada se lena

wo mera KHak-ba-sar chaak-gareban hona

wo tera ek jhalak mujh ko dikha kar chhupna

wo mere dida-e-pur-shauq ka hairan hona

baal bikhrae tera bistar-e-gul par sona

chandni ka wo nisar-e-ruKH-e-taban hona

kali zulfon ka bikharna tere ruKHsaron par

mere shiraaza-e-KHatir ka pareshan hona

ek duniya-e-tamanna tha tere shauq mein dil

KHun rulata hai ab is ghar ka bayaban hona

uTh chale jalwa-gah-e-naz ke rangin parde

jazba-e-shauq zara silsila-jumban hona

ai 'wali' chain tah-e-qabr bhi dega na mujhe

mere marne pe sitamgar ka pasheman hona