hath aa saka hai silsila-e-jism-o-jaan kahan

haath aa sakā hai silsila-e-jism-o-jāñ kahāñ

apnī talab meñ ghuum chukā huuñ kahāñ kahāñ

jis bazm meñ gayā talab-e-sar-ḳhushī liye

mujh se tire ḳhayāl ne pūchhā yahāñ kahāñ

maiñ aaj bhī ḳhalā meñ huuñ kal bhī ḳhalā meñ thā

mere liye zamīn kahāñ āsmāñ kahāñ

tū hai so apne husn ke bā-vasf ġham-nasīb

maiñ huuñ to mere haath meñ kaun-o-makāñ kahāñ

hotī hai ek dushmanī o dostī kī had

is had ke ba.ad zahmat-e-lafz-o-bayāñ kahāñ

rāh-e-junūñ meñ tesha-ba-dast aa gayā huuñ maiñ

har sañg hai girāñ magar itnā girāñ kahāñ

ab chhoḌiye tasavvur-e-zulf-o-mizha 'sahar'

dasht-e-ġham-e-jahāñ meñ koī sā.ebāñ kahāñ

hath aa saka hai silsila-e-jism-o-jaan kahan

apni talab mein ghum chuka hun kahan kahan

jis bazm mein gaya talab-e-sar-KHushi liye

mujh se tere KHayal ne puchha yahan kahan

main aaj bhi KHala mein hun kal bhi KHala mein tha

mere liye zamin kahan aasman kahan

tu hai so apne husn ke ba-wasf gham-nasib

main hun to mere hath mein kaun-o-makan kahan

hoti hai ek dushmani o dosti ki had

is had ke baad zahmat-e-lafz-o-bayan kahan

rah-e-junun mein tesha-ba-dast aa gaya hun main

har sang hai giran magar itna giran kahan

ab chhoDiye tasawwur-e-zulf-o-mizha 'sahar'

dasht-e-gham-e-jahan mein koi saeban kahan