hath ki jumbish se mai chhalki paimane badnam hue

haath kī jumbish se mai chhalkī paimāne badnām hue

ḳhud pī pī kar duniyā bahkī maiḳhāne badnām hue

kūcha-e-ulfat meñ jo aayā kho ke numūd-o-nām gayā

dīvāne dīvāne Thahre farzāne badnām hue

hosh-o-ḳhirad ke charchoñ meñ likkhe kā bharam bhī qaa.em thā

dīda-o-dil kī bātoñ meñ ab afsāne badnām hue

shab biite jab sham-e-farozāñ kī zau-kārī ḳhatm huī

ḳhaak ke dhabboñ se shīshe par parvāne badnām hue

kuchh har bad-zan kuchh vo bad-zan doshī ab kis ko Thahrā.eñ

ulTī-sīdhī baat kī pach par yārāne badnām hue

bādiya-gardī ābla-pā.ī qismat thī dīvānoñ kī

kis baa.is ai vahshat-e-dil phir vīrāne badnām hue

daur nashīlī āñkhoñ kā to roke se bhī ruk na sakā

lekin chashm-e-kaif-āgīñ ke mastāne badnām hue

hath ki jumbish se mai chhalki paimane badnam hue

KHud pi pi kar duniya bahki maiKHane badnam hue

kucha-e-ulfat mein jo aaya kho ke numud-o-nam gaya

diwane diwane Thahre farzane badnam hue

hosh-o-KHirad ke charchon mein likkhe ka bharam bhi qaem tha

dida-o-dil ki baaton mein ab afsane badnam hue

shab bite jab sham-e-farozan ki zau-kari KHatm hui

KHak ke dhabbon se shishe par parwane badnam hue

kuchh har bad-zan kuchh wo bad-zan doshi ab kis ko Thahraen

ulTi-sidhi baat ki pach par yarane badnam hue

baadiya-gardi aabla-pai qismat thi diwanon ki

kis bais ai wahshat-e-dil phir virane badnam hue

daur nashili aankhon ka to roke se bhi ruk na saka

lekin chashm-e-kaif-agin ke mastane badnam hue