hath phaila na sake bhik ke pyalon ki tarah

haath phailā na sake bhiik ke pyāloñ kī tarah

ham se māñgā na gayā māñgne vāloñ kī tarah

kar na gulshan meñ uchhal-kūd ġhazāloñ kī tarah

chal bahut soch ke shatranj kī chāloñ kī tarah

fāqa-mastoñ pe ināyāt nivāloñ kī tarah

har nivāle meñ magar tanz bhī bāloñ kī tarah

ham rah-e-zīst se guzre haiñ ujāloñ kī tarah

yaad rakkheñge hameñ log misāloñ kī tarah

koī uThtā hī nahīñ shahr meñ qātil ke ḳhilāf

haq-navāoñ ke bhī muñh band the tāloñ kī tarah

ham meñ tahzīb-o-tamaddun bhī adab bhī fan bhī

kal paḌhe jā.eñge ham log maqāloñ kī tarah

tujh se jo koī milā ḳhuuñ meñ nahā kar lauTā

lahja barchhī tirā alfāz haiñ bhāloñ kī tarah

ahl-e-zarf aape se bāhar nahīñ hote 'ārif'

ham samundar the na biphre nadī nāloñ kī tarah

hath phaila na sake bhik ke pyalon ki tarah

hum se manga na gaya mangne walon ki tarah

kar na gulshan mein uchhal-kud ghazalon ki tarah

chal bahut soch ke shatranj ki chaalon ki tarah

faqa-maston pe inayat niwalon ki tarah

har niwale mein magar tanz bhi baalon ki tarah

hum rah-e-zist se guzre hain ujalon ki tarah

yaad rakkhenge hamein log misalon ki tarah

koi uThta hi nahin shahr mein qatil ke KHilaf

haq-nawaon ke bhi munh band the talon ki tarah

hum mein tahzib-o-tamaddun bhi adab bhi fan bhi

kal paDhe jaenge hum log maqalon ki tarah

tujh se jo koi mila KHun mein naha kar lauTa

lahja barchhi tera alfaz hain bhaalon ki tarah

ahl-e-zarf aape se bahar nahin hote 'arif'

hum samundar the na biphre nadi nalon ki tarah