hath se chhu kar ye nila aasman bhi dekhte

haath se chhū kar ye niilā āsmāñ bhī dekhte

jo ufuq ke paar haiñ vo bastiyāñ bhī dekhte

mutma.in haiñ jo bahut khulte darīche dekh kar

vo kisī din band hotī khiḌkiyāñ bhī dekhte

is ḳharābe meñ bhī mumkin hai koī ābād ho

ik nazar andar se ye ujḌā makāñ bhī dekhte

aaj jis tan par nazar aatī hai zaḳhmoñ kī qabā

kal usī tan par libās-e-parniyāñ bhī dekhte

sirf aḳhbāroñ kī surḳhī tak rahī jin kī nazar

kaash vo chehroñ pe likkhī dāstāñ bhī dekhte

khīñch laa.ī hai jinheñ is dar pe sho.aloñ kī tapish

kaash vo is ghar pe mañDlātā dhuāñ bhī dekhte

zaḳhm siine par to 'rāshid' sah liyā ham ne magar

tiir ye jis se chalā thā vo kamāñ bhī dekhte

hath se chhu kar ye nila aasman bhi dekhte

jo ufuq ke par hain wo bastiyan bhi dekhte

mutmain hain jo bahut khulte dariche dekh kar

wo kisi din band hoti khiDkiyan bhi dekhte

is KHarabe mein bhi mumkin hai koi aabaad ho

ek nazar andar se ye ujDa makan bhi dekhte

aaj jis tan par nazar aati hai zaKHmon ki qaba

kal usi tan par libas-e-parniyan bhi dekhte

sirf aKHbaron ki surKHi tak rahi jin ki nazar

kash wo chehron pe likkhi dastan bhi dekhte

khinch lai hai jinhen is dar pe shoalon ki tapish

kash wo is ghar pe manDlata dhuan bhi dekhte

zaKHm sine par to 'rashid' sah liya hum ne magar

tir ye jis se chala tha wo kaman bhi dekhte