hath se napta hun dard ki gahrai ko

haath se nāptā huuñ dard kī gahrā.ī ko

ye nayā khel milā hai mirī tanhā.ī ko

thā jo siine meñ charāġh-e-dil-e-pur-ḳhūñ na rahā

chāTiye baiTh ke ab sabr-o-shakebā.ī ko

dil-e-afsurda kisī tarah bahaltā hī nahīñ

kyā kareñ aap kī is hausla-afzā.ī ko

ḳhair badnām to pahle bhī bahut the lekin

tujh se milnā thā ki par lag ga.e rusvā.ī ko

nigah-e-nāz na milte hue ghabrā ham se

ham mohabbat nahīñ kahne ke shanāsā.ī ko

dil hai nairangī-e-ayyām pe hairāñ ab tak

itnī sī baat bhī mā'lūm nahīñ bhaa.ī ko

hath se napta hun dard ki gahrai ko

ye naya khel mila hai meri tanhai ko

tha jo sine mein charagh-e-dil-e-pur-KHun na raha

chaTiye baiTh ke ab sabr-o-shakebai ko

dil-e-afsurda kisi tarah bahalta hi nahin

kya karen aap ki is hausla-afzai ko

KHair badnam to pahle bhi bahut the lekin

tujh se milna tha ki par lag gae ruswai ko

nigah-e-naz na milte hue ghabra hum se

hum mohabbat nahin kahne ke shanasai ko

dil hai nairangi-e-ayyam pe hairan ab tak

itni si baat bhi ma'lum nahin bhai ko