ہاتھ اٹھتا ہے مرا جب بھی رگ جاں کی طرف

ہاتھ اٹھتا ہے مرا جب بھی رگ جاں کی طرف

دل سے آواز یہ آتی ہے بیاباں کی طرف

اے جنوں راہ محبت میں مرا ساتھ نہ چھوڑ

اک نظر دیکھ تو لے جیب و گریباں کی طرف

دل کی ضد ہے کہ ابھی محفل جاناں میں رہوں

عمر کہتی ہے چلو شہر خموشاں کی طرف

دیکھیں اس دور میں کیا حال ہوا ہے دل کا

لے چلو مجھ کو ذرا شہر نگاراں کی طرف

دل دھڑکتا ہے مرا باد صبا کچھ تو بتا

کیوں خزاں جاتی نہیں صحن گلستاں کی طرف

جانے کیا اہل نظر دیکھ رہے ہیں اخترؔ

ان کے دامن کی طرف میرے گریباں کی طرف