hathon ki lakiron ka likha kaT rahe hain

hāthoñ kī lakīroñ kā likhā kaaT rahe haiñ

ham apne gunāhoñ kī sazā kaaT rahe haiñ

miTtī nahīñ tārīḳh se koī bhī ibārat

tārīḳh likhegī ki likhā kaaT rahe haiñ

hai aaj kī fasloñ meñ adāvat hī adāvat

kyā boyā thā ham ne yahāñ kyā kaaT rahe haiñ

ham phuul haiñ mahkeñge jidhar jā.eñge lekin

is baaġh meñ rahne kī sazā kaaT rahe haiñ

gaate the kabhī vo bhī mohabbat ke tarāne

mauqa jo milā hai to galā kaaT rahe haiñ

āsān banānā hai mohabbat kī Dagar ko

chun chun ke so ham lafz-e-vafā kaaT rahe haiñ

hathon ki lakiron ka likha kaT rahe hain

hum apne gunahon ki saza kaT rahe hain

miTti nahin tariKH se koi bhi ibarat

tariKH likhegi ki likha kaT rahe hain

hai aaj ki faslon mein adawat hi adawat

kya boya tha hum ne yahan kya kaT rahe hain

hum phul hain mahkenge jidhar jaenge lekin

is bagh mein rahne ki saza kaT rahe hain

gate the kabhi wo bhi mohabbat ke tarane

mauqa jo mila hai to gala kaT rahe hain

aasan banana hai mohabbat ki Dagar ko

chun chun ke so hum lafz-e-wafa kaT rahe hain