habs ke aalam mein mahbas ki faza bhi kam nahin

habs ke aalam meñ mahbas kī fazā bhī kam nahīñ

rauzan-e-dīvār-e-zindāñ kī havā bhī kam nahīñ

shorish-e-zanjīr-e-pā par haiñ agar pābandiyāñ

halke halke jumbish-e-zanjīr-e-pā bhī kam nahīñ

gar sar-e-maqtal na ho zikr-e-butāñ kā hausla

hujra-e-tārīk meñ yād-e-ḳhudā bhī kam nahīñ

rahrav-e-shab kyuuñ charāġh-e-mah se daryūza-garī

raat añdherī ho to jugnū kī ziyā bhī kam nahīñ

laakh mohkam ho hisār-e-marhabī-o-antarī

ġhāziyoñ kā bāzū-e-ḳhaibar-kushā bhī kam nahīñ

ahd-e-gul se sāzish-e-bād-e-ḳhizāñ bhī kam na thī

shāḳh-e-gul se sozish-e-barq-e-balā bhī kam nahīñ

kyā huā gar vā.iz-o-mullā ke dil haiñ be-charāġh

gosha-e-masjid meñ nanhā sā diyā bhī kam nahīñ

lazzat-e-bāda hai jāñ-parvar magar ai ahl-e-zauq

zahr-e-ashk-o-qatra-e-ḳhūñ kā mazā bhī kam nahīñ

habs ke aalam mein mahbas ki faza bhi kam nahin

rauzan-e-diwar-e-zindan ki hawa bhi kam nahin

shorish-e-zanjir-e-pa par hain agar pabandiyan

halke halke jumbish-e-zanjir-e-pa bhi kam nahin

gar sar-e-maqtal na ho zikr-e-butan ka hausla

hujra-e-tarik mein yaad-e-KHuda bhi kam nahin

rahraw-e-shab kyun charagh-e-mah se daryuza-gari

raat andheri ho to jugnu ki ziya bhi kam nahin

lakh mohkam ho hisar-e-marhabi-o-antari

ghaziyon ka bazu-e-KHaibar-kusha bhi kam nahin

ahd-e-gul se sazish-e-baad-e-KHizan bhi kam na thi

shaKH-e-gul se sozish-e-barq-e-bala bhi kam nahin

kya hua gar waiz-o-mulla ke dil hain be-charagh

gosha-e-masjid mein nanha sa diya bhi kam nahin

lazzat-e-baada hai jaan-parwar magar ai ahl-e-zauq

zahr-e-ashk-o-qatra-e-KHun ka maza bhi kam nahin