had ho chakki hai sharm-e-shakebai KHatm ho

had ho chakkī hai sharm-e-shakebā.ī ḳhatm ho

behtar hai ab duā kī pazīrā.ī ḳhatm ho

leñge hisāb mujh se abhī lafz lafz kā

yaanī zarā ye anjuman-ārā.ī ḳhatm ho

dekhā hai is navāh meñ vo kuchh ki ai ḳhudā

ab to yahī dikhā ki ye bīnā.ī ḳhatm ho

mumkin hai muntazir ho koī ḳhāk-e-ḳhush-ḳhisāl

shāyad kahīñ ye sāhil-e-rusvā.ī ḳhatm ho

hai duud ḳhāk-dār bahut paak ho havā

paanī hai zer-e-bār bahut kaa.ī ḳhatm ho

ḳhush-rañg meñ ghulā huā bad-rañg ho judā

aur shor meñ chhupī huī tanhā.ī ḳhatm ho

apne muqābil aap hī aa jā.ūñgā kabhī

tañg aa chukā huuñ ab mirī yaktā.ī ḳhatm ho

aakar vo merī baat sune aur javāb de

gar yuuñ nahīñ to phir ye shanāsā.ī ḳhatm ho

bāzār-e-bosa tez se hai tez-tar 'zafar'

ummīd to nahīñ ki ye mahñgā.ī ḳhatm ho

had ho chakki hai sharm-e-shakebai KHatm ho

behtar hai ab dua ki pazirai KHatm ho

lenge hisab mujh se abhi lafz lafz ka

yani zara ye anjuman-arai KHatm ho

dekha hai is nawah mein wo kuchh ki ai KHuda

ab to yahi dikha ki ye binai KHatm ho

mumkin hai muntazir ho koi KHak-e-KHush-KHisal

shayad kahin ye sahil-e-ruswai KHatm ho

hai dud KHak-dar bahut pak ho hawa

pani hai zer-e-bar bahut kai KHatm ho

KHush-rang mein ghula hua bad-rang ho juda

aur shor mein chhupi hui tanhai KHatm ho

apne muqabil aap hi aa jaunga kabhi

tang aa chuka hun ab meri yaktai KHatm ho

aakar wo meri baat sune aur jawab de

gar yun nahin to phir ye shanasai KHatm ho

bazar-e-bosa tez se hai tez-tar 'zafar'

ummid to nahin ki ye mahngai KHatm ho