had se baDhti hui tazir mein dekha jae

had se baḌhtī huī ta.azīr meñ dekhā jaa.e

ḳhvāb ko ḳhvāb kī ta.abīr meñ dekhā jaa.e

dekhne ko maiñ faqat itnā bachā huuñ ya.anī

mujh ko ik manzar-e-tasvīr meñ dekhā jaa.e

khul bhī saktā hai jahāñ par mirā andāz-e-junūñ

zaḳhm jo halqa-e-zanjīr meñ dekhā jaa.e

sabr bhī jis ke nishāne pe hai aur siina bhī

hausla kitnā hai us tiir meñ dekhā jaa.e

is qadar dīda-e-giryāñ kā to haq bantā hai

ab use nāla-e-shab-gīr meñ dekhā jaa.e

tab kahīñ dard utartā hai rag-o-pai meñ 'na.īm'

sher jab 'mīr' kī tāsīr meñ dekhā jaa.e

had se baDhti hui tazir mein dekha jae

KHwab ko KHwab ki tabir mein dekha jae

dekhne ko main faqat itna bacha hun yani

mujh ko ek manzar-e-taswir mein dekha jae

khul bhi sakta hai jahan par mera andaz-e-junun

zaKHm jo halqa-e-zanjir mein dekha jae

sabr bhi jis ke nishane pe hai aur sina bhi

hausla kitna hai us tir mein dekha jae

is qadar dida-e-giryan ka to haq banta hai

ab use nala-e-shab-gir mein dekha jae

tab kahin dard utarta hai rag-o-pai mein 'naim'

sher jab 'mir' ki tasir mein dekha jae