haden baDhne lagi thi tirgi ki

hadeñ baḌhne lagī thī tīrgī kī

kamī jab ho ga.ī thī raushnī kī

ḳhudā tū hī batā kis baat pe ye

sazā ham ko milī hai zindagī kī

koī kartā nahīñ hai intizār ab

zarūrat bhī nahīñ paḌtī ghaḌī kī

kareñ duniyā jahāñ kī fikr kyoñ ham

hamārī umr hai āvārgī kī

ham ik muddat se ro.e jā rahe haiñ

chukānī paḌ rahī qīmat hañsī kī

ḳhushī meñ yaad nā aa.ī ḳhudā kī

jab aayā ġham usī kī bandagī kī

maiñ ab har chiiz se uktā chukā huuñ

mujhe mat do duā.eñ zindagī kī

haden baDhne lagi thi tirgi ki

kami jab ho gai thi raushni ki

KHuda tu hi bata kis baat pe ye

saza hum ko mili hai zindagi ki

koi karta nahin hai intizar ab

zarurat bhi nahin paDti ghaDi ki

karen duniya jahan ki fikr kyon hum

hamari umr hai aawargi ki

hum ek muddat se roe ja rahe hain

chukani paD rahi qimat hansi ki

KHushi mein yaad na aai KHuda ki

jab aaya gham usi ki bandagi ki

main ab har chiz se ukta chuka hun

mujhe mat do duaen zindagi ki