hadis-e-dard ka qissa zabani yaad rakkhenge

hadīs-e-dard kā qissa zabānī yaad rakkheñge

ġham-e-dil tere ashkoñ kī kahānī yaad rakkheñge

sar-e-mahfil satāyā thā rulāyā thā uThāyā thā

ham apne dostoñ kī mehrbānī yaad rakkheñge

uThā.e un ke va.adoñ ke sitam bhī zaḳhm yādoñ ke

chalo ye be-muravvat zindagānī yaad rakkheñge

ye mehr-e-zaḳhm-e-dil zaḳhm-e-jigar zaḳhm-e-javānī hai

rakheñge yaad ham us kī nishānī yaad rakkheñge

na uTThā hai dhuāñ dil se na ḳhākistar banā hai dil

ḳhudāyā soz-e-ġham-hā-e-nihānī yaad rakkheñge

kabhī dekhā nahīñ ham ko mohabbat se muravvat se

guzarte vaqt kī ye bad-gumānī yaad rakkheñge

kabhī yādoñ kī mahfil meñ kabhī ashkoñ kī manzil meñ

kisī kī gul-fishānī ḳhūñ-fishānī yaad rakkheñge

kafan ḳhāmosh thā be-jān thā behis thā be-kas thā

sadā-e-be-sadā kī nauha-ḳhvānī yaad rakkheñge

dam-e-āḳhir tasavvur un kā aaya hai 'shafaq' ham ko

qayāmat tak ye marg-e-nā-gahānī yaad rakkheñge

hadis-e-dard ka qissa zabani yaad rakkhenge

gham-e-dil tere ashkon ki kahani yaad rakkhenge

sar-e-mahfil sataya tha rulaya tha uThaya tha

hum apne doston ki mehrbani yaad rakkhenge

uThae un ke wadon ke sitam bhi zaKHm yaadon ke

chalo ye be-murawwat zindagani yaad rakkhenge

ye mehr-e-zaKHm-e-dil zaKHm-e-jigar zaKHm-e-jawani hai

rakhenge yaad hum us ki nishani yaad rakkhenge

na uTTha hai dhuan dil se na KHakistar bana hai dil

KHudaya soz-e-gham-ha-e-nihani yaad rakkhenge

kabhi dekha nahin hum ko mohabbat se murawwat se

guzarte waqt ki ye bad-gumani yaad rakkhenge

kabhi yaadon ki mahfil mein kabhi ashkon ki manzil mein

kisi ki gul-fishani KHun-fishani yaad rakkhenge

kafan KHamosh tha be-jaan tha behis tha be-kas tha

sada-e-be-sada ki nauha-KHwani yaad rakkhenge

dam-e-aKHir tasawwur un ka aaya hai 'shafaq' hum ko

qayamat tak ye marg-e-na-gahani yaad rakkhenge