hai aaj mujh par itab aisa ki jit kar haar chun raha hun

hai aaj mujh par itaab aisā ki jiit kar haar chun rahā huuñ

maiñ apne har samt duur tak sirf ḳhaar hī ḳhaar chun rahā huuñ

hoñ ḳhvāb zinda to zehn-e-insān un kī ta.abīr māñgtā hai

maiñ is liye apne saare ḳhvāboñ ko bain-S-dīvār chun rahā huuñ

adū se maiñ be-ḳhabar nahīñ huuñ javāb maiñ bhī zarūr dūñgā

maiñ us kā har vaar jhel kar sab se kārgar vaar chun rahā huuñ

ye merā manshūr to nahīñ hai maiñ apne dushman ko bhī sazā duuñ

mire ilāhī maiñ kyoñ qalam chhoḌ kar ye hathiyār chun rahā huuñ

maiñ ahl-e-maġhrib kā muntazir huuñ ḳhudā unheñ kāmyāb kar de

vo jald marham talāsh kar leñ maiñ apne bīmār chun rahā huuñ

ye rāh-e-haq par jo gāmzan haiñ lagā chuke haiñ saroñ kī baazī

jo sar salāmat rakhe hue haiñ unhīñ ko sardār chun rahā huuñ

mire numū se jo ye taġhayyur hai mujh meñ ye bhī kamāl-e-rab hai

maiñ rab kī azmat ke hī tanāzur meñ koī shahkār chun rahā huuñ

hai koī bolī lagāne vaalā ḳharīd le jo zamīr merā

maiñ ek hī ḳhush-nasīb tājir huuñ jo ḳharīdār chun rahā huuñ

abhī ishārā huā hai mujh ko ki saath mere hoñ chand rufaqā

so vāpsī kā hai dar khulā hai maiñ bas vafādār chun rahā huuñ

hai aaj mujh par itab aisa ki jit kar haar chun raha hun

main apne har samt dur tak sirf KHar hi KHar chun raha hun

hon KHwab zinda to zehn-e-insan un ki tabir mangta hai

main is liye apne sare KHwabon ko bain-S-diwar chun raha hun

adu se main be-KHabar nahin hun jawab main bhi zarur dunga

main us ka har war jhel kar sab se kargar war chun raha hun

ye mera manshur to nahin hai main apne dushman ko bhi saza dun

mere ilahi main kyon qalam chhoD kar ye hathiyar chun raha hun

main ahl-e-maghrib ka muntazir hun KHuda unhen kaamyab kar de

wo jald marham talash kar len main apne bimar chun raha hun

ye rah-e-haq par jo gamzan hain laga chuke hain saron ki bazi

jo sar salamat rakhe hue hain unhin ko sardar chun raha hun

mere numu se jo ye taghayyur hai mujh mein ye bhi kamal-e-rab hai

main rab ki azmat ke hi tanazur mein koi shahkar chun raha hun

hai koi boli lagane wala KHarid le jo zamir mera

main ek hi KHush-nasib tajir hun jo KHaridar chun raha hun

abhi ishaara hua hai mujh ko ki sath mere hon chand rufaqa

so wapsi ka hai dar khula hai main bas wafadar chun raha hun