hai ab to wo hamein us sarw-e-sim-bar ki talab

hai ab to vo hameñ us sarv-e-sīm-bar kī talab

ki tā.irān-e-havā se hai bāl-o-par kī talab

jo kahiye husn ko ḳhvāhish nahīñ ye kyā imkāñ

use bhī ahl-e-nazar se hai ik nazar kī talab

kamāl-e-ishq bhī ḳhālī nahīñ tamannā se

jo hai ik aah to us ko bhī hai asar kī talab

parī-ruḳhoñ ko ġharaz kyā thī zeb-o-zīnat se

na hotī gar unheñ apne nazāra-gar kī talab

talab se kis ko rihā.ī hai bahr-e-hastī meñ

agar sadaf hai to us ko bhī hai guhar kī talab

chaman meñ bulbul-o-gul bhī haiñ apne matlab ke

ise hai gul kī talab us ko musht-e-zar kī talab

jahāñ vo bāġh-e-tamannā hai jis ke biich 'nazīr'

jo ik shajar hai to us ko bhī hai samar kī talab

hai ab to wo hamein us sarw-e-sim-bar ki talab

ki tairan-e-hawa se hai baal-o-par ki talab

jo kahiye husn ko KHwahish nahin ye kya imkan

use bhi ahl-e-nazar se hai ek nazar ki talab

kamal-e-ishq bhi KHali nahin tamanna se

jo hai ek aah to us ko bhi hai asar ki talab

pari-ruKHon ko gharaz kya thi zeb-o-zinat se

na hoti gar unhen apne nazara-gar ki talab

talab se kis ko rihai hai bahr-e-hasti mein

agar sadaf hai to us ko bhi hai guhar ki talab

chaman mein bulbul-o-gul bhi hain apne matlab ke

ise hai gul ki talab us ko musht-e-zar ki talab

jahan wo bagh-e-tamanna hai jis ke bich 'nazir'

jo ek shajar hai to us ko bhi hai samar ki talab