ہے عبث یہ دہر اور اس دہر کا بازار بھی

ہے عبث یہ دہر اور اس دہر کا بازار بھی

چھوڑ دے اے دل مرے دنیا کا کاروبار بھی

بیٹھ جاتا ہوں تو پھر اٹھنا بڑا دشوار ہے

جانے کیسا لطف دیتا ہے دیار یار بھی

جان لیوا ہے تری ہر ہر ادا اے جان جاں

خامشی بھی نطق بھی اقرار بھی انکار بھی

ظلم سہتے جائیے اور مسکراتے جائیے

عشق میں ہے عار درد و کرب کا اظہار بھی

شان مومن دیکھنا ہو گر تو آ میدان میں

قوت بازو کے آگے ہیچ ہے تلوار بھی

جھوم جاؤ گے کبھی تنہائیوں میں بیٹھ کر

گنگنا کے دیکھنا پروازؔ کے اشعار بھی