hai abhi mahtab baqi aur baqi hai sharab

hai abhī mahtāb baaqī aur baaqī hai sharāb

aur baaqī mere tere darmiyāñ sad.hā hisāb

dil meñ yuuñ bedār hote haiñ ḳhayālāt-e-ġhazal

āñkheñ malte jis tarah uTThe koī mast-e-shabāb

gesū-e-ḳhamdār meñ ash.ār-e-tar kī ThanDakeñ

ātish-e-ruḳhsār meñ qalb-e-tapāñ kā iltihāb

ek aalam par nahīñ rahtī haiñ kaifiyyāt-e-ishq

gaah registāñ bhī dariyā gaah dariyā bhī sarāb

kaun rakh saktā hai is ko sākin-o-jāmid ki ziist

inqilāb-o-inqilāb-o-inqilāb-o-inqilāb

DhūñDiye kyoñ isti.āra aur tashbīh-o-misāl

husn to vo hai batā.eñ jis ko husn-e-lā-javāb

ai 'firāq' uThtī haiñ hairat kī nigāheñ bā-adab

us ke dil kī ḳhalvatoñ meñ ho rahā huuñ bāryāb

hai abhi mahtab baqi aur baqi hai sharab

aur baqi mere tere darmiyan sadha hisab

dil mein yun bedar hote hain KHayalat-e-ghazal

aankhen malte jis tarah uTThe koi mast-e-shabab

gesu-e-KHamdar mein ashaar-e-tar ki ThanDaken

aatish-e-ruKHsar mein qalb-e-tapan ka iltihab

ek aalam par nahin rahti hain kaifiyyat-e-ishq

gah registan bhi dariya gah dariya bhi sarab

kaun rakh sakta hai is ko sakin-o-jamid ki zist

inqilab-o-inqilab-o-inqilab-o-inqilab

DhunDiye kyon istiara aur tashbih-o-misal

husn to wo hai bataen jis ko husn-e-la-jawab

ai 'firaq' uThti hain hairat ki nigahen ba-adab

us ke dil ki KHalwaton mein ho raha hun baryab